نظرة عامة حول تخصص المواد التجارية

نظرة عامة حول تخصص المواد التجارية
(77 مراجعة)

Questions and answers of the customers

  1. Q حبيت استفسر هل التجاري يدخلك تخصص artistic design؟ يعني مجال التصميم و غيرها
    A
    وعليكم السلام يعتمد ع شروط قبول الجامعة في العام الماضي لم يسمح للطلاب الدخول في كلية الهندسة والله اعلم
  2. Q حبيت استفسر هل التجاري راح يدخلك تخصص تقنية المعلومات سواءا علم الحاسوب أو الأمن السيبراني
    A فقط بكالريوس نظم المعلومات حسب قبول جامعة البحرين
  3. Q هل التجاري يدخل شريعه اسلاميه ؟؟
    A أي، التجاري يدخلك كل التخصصات عدا الطب
  4. Q الرياضيات صعب ؟
    A مو صعب ، في رياضيات موحد بين جميع المستويات
  5. Q اذا كانت نسبتي ٩٣.٣ تنصحوني ادخل تجاري؟؟ بآرتفع؟.. و آنا علطول في الانج اييب في الثمانينات فعادي الوضع؟
    A أي ممكن ، يعتمد عليكم وعلى الشغف الموجود
    Show all 3 answers
التصنيفات: ,

77 مراجعة لـ نظرة عامة حول تخصص المواد التجارية

  1. commbh –

    سهل جداً جداً بس يمبي ليه شوية تركيز وامورك في السليم👌🏻🔥

  2. commbh –

    التخصص حلو واغلب المواد سهله وممتعه بس في مواد تحتاج تركيز من البدايه مثل المحاسبه والمال عشان ماتضيعون ويصير صعب عليكم

  3. commbh –

    “تخصص جميل في البداية كنت محتار بين التخصصات واخترت التخصص العلمي لكن فكرت فيها بما ان التخصص إلى بدخله في الجامعة ماله علاقة بالعلمي أخترت تجاري لاكن ما كنت متأكد وبدأ الفصل الثالث وأخيراً حسيت بأني ادرس شي احبه المواد سهلة وبسيطة مو لأنه تجاري لاني قاعد ادرس شي احبه والرياضيات فيه بسيط وقوانيه جميلة وحتى الحفظ فيه بسيط اما بالنسبة للتخوف من الانج فكان عندنا في الفصل الأول مادتين فيهم انج أدر ومال من أجمل المواد الي درستهم سهلين وبسيطين وما فيهم الانج القوي بقدر الفهم
    الي بيختار التخصص لا يحتار
    #التجاري_قدها”

  4. commbh –

    تخصص جميل وممتع فيه السهل وفيه الصعب بس تقدر تخلي الصعب سهل بالدراسة اول بأول ❤️❤️

  5. commbh –

    تخصص جميل ومُمتع في الوقت نفسه، ما تعودت ارجع البيت افتح الكتاب ادرس ولكن لما دشيت تخصص التجاري من كثر ما احب المواد واستمتع فيهم اثناء الشرح وحل المساءل في المدرسة، صرت ارجع البيت احل تمارين .. أبداً ما ندمت اني دخلت هالتخصص ولو يرجع فيني الزمن برد اختاره

  6. commbh –

    تخصص وااااايد حلو وسهل بس مافي شي صعب اذا كنت جاد وحاط على روحك من بدايه الفصل انا كنت محتاره بين الادبي والتجاري مع ان كان الريض في وحد فالخمسين والثقف فالسبعين بس بعد كنت حاسه انه تخصص حلو بس كان الادبي ماخذ نسبه اكبر اني ادشه لدرجه سجلت فيه وعطوني الكتب وداومت اول يوم كأدبي بس لما رجعت البيت حسيت اني مب مرتاحه هاي مو مكاني هاي مو ميولي صليت استخاره والحمدلله الحمدلله في يوم وليله نقلت الى تجاري والحين احمد ربي اني نقلت وحطيت بالي ععدددددل عدل في اول فصل لان يتراكم كل شي ويكون يديد علينا وكلمات يديده وصعبه شوي ومعادلات وقوانين ف كنت ارجع البيت واحفظ كل شي من البدايه او حتى اقراه عشان اذا تكرر علي مره ثانيه اكون حافظته اهم شي اول فصل والله عقب تقدرون تتعبون روحكم اكثر او ترتاحون بس لا تخرطونها مافي شي صعب ولا في شي سهل اذا حطيت بالك عدل بيصير سهل لدرجه اول فصل ارتفع معدلج خمس درجات تراكمي ودشيت التسعين الفصلي ( التجااااري يرفع المعدل عدل بس حطو بالكم ولا تخرطونها ) اول فصل كان كل شي صعب علي ووايد تعبت وايد وايد لدرجه اواصل يومين حق المنتصف او النهائي وما اروح المدرسه الا وخلصت كل شي ادرسه بس عقب يوم جفت درجتي راح كل التعب من عيني وقلت يسوى التعب والله يبرد الخاطر حتى اذا تحسون روحكم ما تبون تدرسون كل شي في يوم واحد حق المنتصف تقدرون تحفظون المطلوب حق الاختبار الشهري كانه منتصف تحفظونه حفظ منها درجات ومنها حافظين حق المنتصف مجرد تعيدون عليه والله يوفقكم يارب ويسهل عليكم ❤️

  7. commbh –

    انطباعي كان قبل الدخول ان التجاري مواده سهله وجميلة وخفيفة وال سمعته ان اغلبه عملي حسابات اكاونت وغيرها ولكن للاسف لما دخلت انصميت ان كانت مواد الحفظ جداً كثيرة وبعضها غَلج وغير ان التجاري ياخدون فالفصل الخامس ماده اضافية وهي عربي وحفظ ايضاً ولكن بشكل عام التخصص سهل وحليو للي يحبون المواد التجارية ويقدرون يحفظون

  8. commbh –

    “تخصص التجاري وايد سهل وخفيف بس لازم يبيلة همّة مو معناته انه سهل يعمي تستهتر فيه
    بالعكس المواد الحلوة الي فيه تخليك تستمتع وانت تدرس وبكل سهولة تقدر انك ترفع معدلك اذا شديت على روحك شوي
    وكل التوفيق “

  9. commbh –

    مواد سهلة و ممتعة بنفس الوكت كل ماعطيت فيها كل ما استمتعت بمحتواها و بعض المواد تكون من واقع الحياه فتسهل على الطلاب الدراسه و الحفظ

  10. commbh –

    في وايد اوادم تخاف من التجاري و تشرد منه لان عبالها ان كله انجليزي و كله رياضيات بس المعلومة كلش كلش غلط لان الانجليزي الي فيه كلش بسيط و كلماته سهلة و المدرسين مايقصرون يعطونكم لسته بالكلمات الي تحتاجونها و بالنسبة حق الرياضيات الاكاونت و المال مثلا مايعتبرون رياضيات كلش. في نفس الوقت لاحظت وايد اوادم يدخلون تجاري عشان ولله احنه مابنتعب روحنه و اكيد المواد سهلة و غيره انا كلش ماقاعدة اخوفكم بس ولاشي ف الدنيا بنحصله بدون تعب كل التخصصات سواء تجاري ولا علمي ولا ادبي ولا حتى تلمذة لازم ندرس اول بأول و نتعب عشان نحس ان المادة سهلة وقت الامتحان. التجاري بشكل عام وايد وايد حلو لان احنه عبارة قاعدين ندرس اشياء من واقع الحياة مثلا الادر ولا قانون العمل هاي اشياء بتحتاجونها اذا توظفتوا و في النهاية اعيد و اكرر لحد يدخل تجاري عشان سهل او عشان صديق دخلوا لان انتوا صج صج تبونه عشان تقدرون تبدعون فيه💕💕

  11. commbh –

    تخصص التجاري من امتع التخصصات الي الطالب ممكن يدرسها (اذا كان حابها طبعا ) فيها مواد متنوعة وممتعة صح احيانا في مواد كانت ثقيلة بس صجج كنت استمتع وانا ادرس كل مادة في هالتخصص ، بس نصيحة لاتحط في بالك ان بدش التجاري لان سهل لااا نهائيا مافي شي سهل تبي نتيجة حلوة ؟؟ تبي درجة حلو ؟؟ اتعب وادرس واجتهد وبدع وصدقني تعبك مابيضيع في هالتخصص

  12. commbh –

    “تخصص جميل يجعلك مثقف في العديد من جوانب الحياة (المالية سواءًا ام غيرها) و بالنسبة للمواد مواد سهلة و سلسة إلى الذي يحبها و أختار التخصص المناسب له جميع المواد تحتاج دراسة و مراجعة مستمرة و انا سعيدة أن في مملكة البحرين يمنحون هذا التخصص حقه فمنذ المرحلة الثانوية و هم يمنحونك خيارات متعددة لتطوير نفسك في المجال الذي تجده مناسبًا لك بالكثير من المجالات
    العلوم التجارية علمتني واجد و اني اليوم قادرة أفتح مشروع بسبب الثقافة التي حصلت عليها منذ الثانوية”

  13. commbh –

    “اولشي بقوله ان التخصص حليو للي صدق ميوله تجاري ويحب هالمواد لحد بدشه عشانه سهل وميوله علمي بس خايف يدشه لان صعب ، انصحكم تدشون التخصص الي صدق انتون تحبونه لا تدشون تخصص عشانه سهل او شي لانه ما بيعجبكم اذا مو ميولكم ويمكن ما تمشون عدل وتكرهونه و ترا ف النهايه كلهم يحتاجون دراسه.

    التجاري واجد واجد حليو مواده مو صعبه بس تحتاج دراسه باللذات الاكاونت يحتاج انك تكون متابع أول بأول وتراجع كل درس بدرسه حق ما يتعبك بعدين .. و بالنسبه للي يقولون ان كله رياضيات و انج ترا لا بالعكس المواد الي بالانج عادةً تجي امتحاناتها اسهل من الي بالعربي هذا الي حسيته يعني ولو ويش ماتفهم ف الانج بتمشي فيهم لان مو صعبين و غير هذا المعلمه او الاستاذ يشرحون بالعربي و بالانج ف كل الي عليك انك تفهم وتحفظ المصطلحات المهمه ، و الرياضيات ماله سهل مو صعب وحليو واجد و الي يفكر الاكاونت رياضيات ترا لا غير كلش كله زائد وناقص وهالسوالف يعني ويعتمد اعتماد كبيييررر على الفهم كل ماتكون فاهمنه وفاهم الافكار فيه كل ما جبت فيه درجات حليو وسهل وممتع ، وبس يعني التخصص حليو وسهل وممتع واجد واجد وبس تفهم المواد امورك كلها تمام ، ويرفع المعدل باللذات اول كورس فيه حطو بالكم فيه عدل لان المواد ماي لاتضيعونهم رفعو معدلاتكم ابهم بس مو يعني ماتدرسون ترا يحتاج دراسه .. بالتوفيق 💙. “

  14. commbh –

    تخصص جدا سهل ومريح وممتع للشخص اللي يتابع ويدرس، بس اذا تتوقع انه معدلك بيزيد والتخصص سهل بدون دراسة ومتابعة فهذا كلام غلط وما يمشي. انا بمنظوري واللي شفته شخصيا اشوف تخصص التجاري مظلوم اعلاميا والكل (حتى المدرسين وبعض المرشدين) ماخذين صورة سيئة عنه للاسف. فاذا في بالكم تروحون ترى تخصص حلو وفيه خير ولا تاخذ على كلام كل الناس.

  15. commbh –

    تخصص جميل وليس فقط لرفع معدلك التراكمي و هذه الفكرة شائعة عن تخصص التجاري سهل و لرفع المعدل هو صح ان بيرفع معدلك و لكن إذا اهملت ما بتنجح حتى مع مادة المهر الي تعطيك 100 درجة بلا امتحان. التخصص يحتاج شوية اهتمام خاصة للطلبة الي ضعيفين للانج ولكن ضعفك في اللغة ليس عائق لعدم التفوق ابدا. التخصص فيه مواد محاسبة و رياضيات في و هذا الي يخسبق الطلبة بعد وقوعهم في فخ ان التخصص سهل. وفي مواد تحتاج حفظ او فهم او الاثنين معا مثل جود تأمين الخ. تخصص أنصح فيه للجميع إذا كانت ميولك تجارية و هذا اهمشي انك تعرف ويش تبي تصير في المستقبل عشان تتخذ قرار التخصص الي هو أول قرار كبير تاخده في حياتك. و لو كنت متفوق مثلي راح تچوف كثير ناس يقولون لك قرارك غبي و چان دشيت علمي بس لا تسمع حچيهم و وواصل لتحقيق حلمك. أنا شخصيا طالب اهملت الفصل الأول و جبت 92.8 و الفصل الثاني جبت 97.3 فصار التراكمي أول سنة 95. أول فصل تجاري جبت 98.5 ليس لان التخصص سهل لا لأن إذا بذلت جهد وعملت بجد بتوصل. وافضل الكرونا جبت 99.3 ووصل التراكمي 97 لله الحمد. و أكبر نصيحة الي يبي يجب درجات عالية ادرس كل يوم لو نص ساعة افضل من تدرس قبل يوم الامتحان طول اليوم ادرس شوي كل يوم عشان تكون تجربة ممتعة و ما تتملل و شكرا.

  16. commbh –

    في بادئ الأمر كنت محتارة واجد بين إن أدخل تجاري أو علمي مع العِلم إن رغبتي في الاثنين كانت بنفس المستوى بس بسبب الاهمال في أول ومعدلي كان واجد نازل بالنسبة لكل معدلاتي السابقة كان “٨٤” قررت أدخل تجاري وكنت متحمسة للتجاري عدل لأن واجد سمعت إنه سهل ويرفع المعدل بسهولة، بس كان في عائق الكل يتكلم عنه إلّا هو اللغة الانجليزية بس في النهاية توكلت على الله ودخلت ، أول كورس فيه ثلاث مواد تجارية المال والأدر والجود ، المال والأدر كانوا بالإنج بس واجد سهلين وخصوصًا إن المعلمات متساعدين واللغة ما كانت تشكل عائق لأن مع تكرار الكلمات ترسخ في المخ ، أما الجود كان ثقيل نوعًا ما لأنه عامةً يعتمد على الحفظ ، بس بعد كان فصل موفّق وقدرت أرفع معدلي فيه وأتوفق في الفصلي والفصل إلّا عقب عندنا تأمين وقانون وأدر ومحاسبة ، هالفصل كان من أحسن الفصول بالنسبة ليي ، كل المواد التجارية سهلة وتعتمد على الفهم أكثر وبسهولة تقدر تجيب فيهم فوق ال٩٥ إذا كنت تدرس عدل ، الفصل الخامس فيه قصد ومحاسبة ، القصد قالوا عنه ثقيل ومو حليو بس يوم درسته بالعكس كان لطيف وطبعًا أكيد المعلمة ليها دور في حب المادة من عدمها والمحاسبة كذلك كان سهل وممتع بس يحتاج يكون الطالب للحين يتذكر محا الفصل الرابع لأنه متراكم ، والفصل السادس فيه أدر ومحاسبة وبنك ، هالفصل الأدر بالعربي بس ما كان صعب ، أما البنك كان ثقيل نوعًا ما ، بالنسبة ليي ما حبيته بس ما كان يكشل عائق لو بندرس أول بأول والمحاسبة كلش زين وجميل ، وطبعًا قدرت أتفوق في كل الفصول ورفعت التراكمي من ٨٤ يوم في أول إلى ٩٢.٦ في توجيهي ، التخصص حليو وممتع وخفيف بس يبى ليه اجتهاد قليلًا.

  17. commbh –

    أغلبية المواد سهله معنها تميل للحفظ ولكن المعلومات سهله بالحفظ وأصعب مادة هي المحاسبة حيث التدريس و المعلومات التي تتلقاها من الاستاذ والموجودة بالكتاب بسيطة و سهله ولكن الوزارة تحط امتحانات في مادة المحاسبة صعبة او تكون سهله ولكن اذا خطأ الطالب خطأ بسيط فيؤثر على الاجابة كامل وتضيع عليه الدرجات حصلت لي مرتين شاطر وكل الامتحانات وي الاستاذ درجات كامله ولكن الامتحانات الي من الوزارة اخطأ خطأ بسيط ويؤثر ع الاجابة النهائية وبالتالي الدرجة تكون مو مثل المستوى بسبب تعمد الوزارة على وضع تحديات واشياء ليست موجودة بالكتاب كلغز ليبين تفاوت الطلاب ، وتكون المصطلحات جديدة ومايعرفها الطالب الغير متمكن من اللغة الانجليزية فتضيع عليه الدرجات . ولكن باختصار كل المواد سهله تحصل فيها 100 حتى المحاسبة عادي ولكن تعتبر اصعبها المحاسبة ، والاساتذة ايضاً يكون لهم دور في ايصال المعلومات بشكل صحيح في مدرستنا كان اغلب الاساتذة لايهتم في التدريس الا في آخر وقت الفصل اخر اسبوعين من الامتحانات يقعد يدرسك من بداية الكتاب لنهايته ..

  18. commbh –

    التجاري تخصص جداً جميل و ممتع ، المقررات تساعدنا حتى في حياتنا المهنية ، المقررات سهلة و بسيطة و لا تحطون في بالكم أن تجاري عبارة عن أنج و ريض ، بالعكس يمكن بس مقررين أو ثلاثة بالانج ، الي بيدخل تجاري و حاط في باله أن التجاري بسهولة يرتفع المعدل و بدون أي تعب (غلطان) صح أن التخصص سهل و لكن حاله كحال كل تخصص يبيله دراسة أول بأول و تركيز و انشاءالله إذا ما قصرتون في الدراسة بيرتفع المعدل (عن تجربة) ، و بالتوفيق للجميع ♥️.

  19. commbh –

    الصراحه تخصص التجاري حلو له الي بيهتم ليه يعني مو ويه القطار الكل يجي توحيد و عقب وين الكل يجي تجاري وهو ويه القطار ما يدري وش بسوي على الموجه بس انا اشوفه من افضل التخصصات بس يبى ليه اهتمام ولحد يقول انا ما اعرف انجليزي عدل انا اعرف بس الانجليزي مال التجاري غير مصطلحاات التخصص يعني مو على قوه انجليزي مالك و نتمنى للجميع التوفيق عندي كلام بعد بس خلاص ما لي زاغر اكتب

  20. commbh –

    سهل وحلو ونستفيد منه اشياء واجد بحياتنا

  21. commbh –

    “تخصص ممتع جدا ..
    المواد الي بتفيدك حق الجامعة (إدارة الأعمل ، المحاسبة) .. وباقي المواد تعطيك ثقافة وخبرة في الحياة من الناحية القانونية والتجارية ..
    تخصص رائع جدا ومتتع بشكل مو طبيعي ..”

  22. commbh –

    من احلى المواد بالنسبة لي لاني من النوع اللي ما احب الحفظ وايد ع المزاج بس 🙂 … و المواد التجارية فيها حفظ بس يعني الحفظ قليل .. و اهم شي الفهم … استمتع فيهم لان كله حسابات 🥺 و خصوصا الاكاونت .. واللي حببني ف المادة بعد المعلمة عسل ❤️❤️❤️ أستاذه سلامه 🥺

  23. commbh –

    “بإختصار انا دخلت التجاري بعد ما حصلت على درجات اقل من اللي ابيها في اول فصلين فدخلت بهدف اني ارفع معدلي والحمد والشكر لله رفعته للي اطمح له.

    على العموم بالنسبة لتخصص التجاري هو حليو مو صعب بس ابداً مو سهل.

    بس! في شي ما حسبت حسابه..🤔
    اللي هو تخصص الجامعة. وش بدش؟ ووين بيكون مستقبلي؟
    هل المسار اللي اخترته يأهلني لتخصص الجامعة؟

    هني عرفت اني لو رحت علمي وبذلت مجهود اكثر كان بيكون افضل. بسس..، هل انا نادم؟ طبعاً لا!
    استفدت واااجد من تخصص التجاري ومتأكد ١٠٠٪ في يوم من الايام بستفيد من اللي تعلمته.

    الخلاصة: اختار المسار اللي تحبه وحط في عين الاعتبار التخصص اللي بتدشه في الجامعة.”

  24. commbh –

    التجاري واايد سهل (للناس الي تدرس) يعني مواده وايد سهله في كل مادة تقدرون تيبون ١٠٠ وادا مو مئة في التسعين ماعليكم من الي يقولون لكم كله انج اني كنت مو شاطره في الانج دخلت تجاري الانج مالتي واايد اطورت لدرجة صرت اييب في الانج ٩٦ + ترى يمكن بس مادة ولا مادتين الي بالانج لكن في اول اكاونت بتاخدونه (الكورس الثاني) انتبهو له عدل عدل وادا استاذكم (او استاذتكم) مو زينين روحو معاهد او يوتيوب بس كلش لاتروحون توجيهي وانتون مو فاهمين اكاونت ١ لانكم بتضيعون عدل وبالنسبة لمادة المال ماعليكم من الي يقولون لكم صعبة اهي كلها قانون تعالو احفظوه وطبقوه وبيلعبون لكم في الاسئلة بس ولله سهل ينجاب فيه ١٠٠ لاتيبون فيه اقل من ٩٠ وبس ولله مسامحة على الاطاله وبالتوفيق♥️♥️♥️ والي عنده اي سؤال او يحتاج مساعة يكلمني على حسابي bayanalhawaj

  25. commbh –

    أني كنت محتارة بين علمي وتجاري وكنت خايفة أدش التجاري كنت عبالي موادهم صعبة وكل انجليزي لان اني شوي ضعيفة في الانج بس مو لديك الدرجة .. فكنت أحط علمي وارد اكنسل احط تجاري يمكن صار ليي هالحركة ثلاث مرات لمن كان خياري الوحيد يوم اخذ الشهادة كنت محتارة لحيني وكنت حاطة علمي فرحت سألت البنات الي اعرفهم داخلين تجاري وقررت ادش التجاري دشيت التجاري عن قناعة وحبيت مواد التجاري وحسيت أني أميل لهل المواد لأن مواد التجاري أكثر واقعية من بقية المواد فمثلاً القصد يتكلم عن أشياء من واقع الحياة في الحياة الاقتصادية مثل البطالة والتضخم … ومادة التأمين تعلمك كيف تأمن مستقبلك وتتعرف على أشياء أنت كنت تجهلها فتخليك تتناقش ويا أهلك وأنت بهالعمر وغيرها من المواد حبيت مواد تجاري وبالأخص لأم معلماتي هم الي حببوني فيهم ..وأحمد ربي أني دخلت تجاري

  26. commbh –

    في ناس واجد اقولون انه التخصص سهل وتقدر ترفع معدلك فيه صح تقدر لاكن كل ماجديت وشتهدت فيه وكثر ماتقدر جد واشتهد المواد فيه حفظ وفي مواد تحصل فيه ١٠٠ بسهولة كل ماحطيت على روحك وجتهدت بيرتفع معدلك

  27. commbh –

    تخصص ممتاز وسهل ولكن يحتاج إلى متابعة بسيطة للحصول على المعدل المطلوب أغلب المواد سهلة بس تحتاج إلى الانتباه في الحصص ولا تتخوفون من اللغة الانجليزية لأنها كلش مو عائق في تخصص التجاري

  28. commbh –

    اول ما دخلت التجاري حسيته صعب لاني كنت ما اعرف انجلينزي ولكن انا دخلت عن رغبة فقلت بواصل حتى لو كان صعب ولكن مع مرور الايام شفت الكلمات والمصطلحات التجارية تتكرر فحفظتها لا ارادياً وهذا اللي خلاني احصل درجات عالية طبعا مع الاجتهاد

  29. commbh –

    “اختيار التخصص الدراسي “” علمي ، أدبي، تجاري “” يعتمد على الرغبات والميول
    بإختصار مافيه شي أسهل من شي
    • العلمي مو صعب بس يعتمد على الشخص نفسه ودراسته “” يبي له دراسة أول بأول “”
    • الأدبي فيه نوعين “” لغات ، علوم انسانية “” الأدبي مافيه ريض لكن فيه انج وفيه اجا ودين
    • آخر تخصص تجاري
    التجاري مو سهل نفس ما يقولون بالعكس حاله حال باقي التخصصات
    المواد الي فيه بعضها تعتمد على الحفظ وبعضها تعتمد على الفهم وبعضها الاثنين
    مثلا المحاسبة لازم ننتبه لشرح المعلم/ة عشان تمشي في هذا التخصص
    المواد الي فالتجاري “” أدارة مكتبية ، تسويق ، إقتصاد ، قانون العمل ، محاسبة ، سفر ، بنك .. “”
    تقدرون ترفعون معدلكم بالتجاري لكن تحطون على روحكم عدل
    اذا تحبون تخصص دشوه بدون تردد وكلكم ثقة وما عليكم من كلام احد عليكم من نفسكم بس
    نصيحة مني لا تدخلون تخصص عشان أحد او ربعكم او بيتكم يبونكم تدشون هالتخصص اعتمدو على رغباتكم وميولكم والتخصص الي تبون تدشونه فالجامعة
    كخريجة مواد تجارية حبيت التخصص والمواد حليوة خصوصا المحاسبة حده يجنن وسهل حبيته فالبداية ما كنت احبه بس مع الوقت تعودت وصرت احل المسائل بروحي واتأكد منه بنفسي واذا يطلع صح استانس”

  30. commbh –

    دخلو تجاري وانتون مغمضين 😎،طبعاً قبل كل شي التخصص حتى لو رجع بي الزمن اختاره مع ان حزتها شكثر كانو يقولون لي علمي!، انت تخصصك تحدده بنفسك لا تسمع كلام الناس اذا كنت متفوق يقولون لك ذا مال كسالى و اذا كنت اقل مستوى يقولون لك صعب و انج ، ولا يقولون لك سهل مايحتاج دراسة 😉 سهل بس مو لدرجة ما تدرس، بس اذا درست بسهولة بترتفع ف انت اختار و ابتعدو و حاسبو اخذو الحذر نصيحة من الاشخاص وبالخصوص الاصدقاء اللي يقولون مادرسنا ماعليكم منهم الاغلبية يجذب و تالي تنصدمون انهم اكثر منكم عليكم بنفسكم ولا تقلدون على احد ولاتاخذون ع كلامهم، مافهمتون شي؟ خصوصاً فمواد الفهم استعينو بأوائل الصف او العارفين للماده واذا ماصار عليكم بالاستاذ حتى لو مو مال الماده نفسها بس من قسم التجر؟عادي كلهم مايقصرون معلمين تجر اعجز اوصفهم صراحة❤️. بالنسبة للمواد، في منها الحفظ وفي منها الفهم و مواد الانج لاتخافون منها كلها حفظ كلمتين ثلاث و فالامتحان يراعوون عدل عادي سوال جوابه المفترض سطر سطرين وتجاوب بكلمتين من اللي حافظنهم تحصل الدرجة او اذا جاوبت بفهمك تحصل ترى سهلة😂 ومواد الحفظ اذا بتحفظون افهمو بيساعدكم الفهم بسهولة اختصرو اذا تبون ، اذا تبون تحفظون باسلوبكم حفظو كله يمشي لاتخافون التجاري عن نفسي محظوظين فيه انه موجود عندنا و مواده مو ممله ممتعه بالعكس و عندكم موقع استاذ ابراهيم امتحانات سابقة ملخصات كلشي كلشي تلاقونه، من اهم المواقع اللي لازمم استعين فيها وبس والله اخر نصيحة، تبون طب؟ دخلو علمي ، ماتبون طب ؟ دخلو تجاري اغلب التخصصات متاحة والسلام😂❤️

  31. commbh –

    تخصص ولا اروع فيه اشياء كثيره تفهمها في المحاسبه و التسويق و البيع والسفر و غير ذالك و في مواد بسيطه جداً وعدد ساعاتها (٤) مثل الجود قد تساعد ع رفع المعدل ونتمنى التوفيق لطلابنا

  32. commbh –

    من افضل و اهم الاختيارات الي اخترتها في حياتي

  33. commbh –

    تخصص ولا اروع والمواد سهلة وبسيطه 👌

  34. commbh –

    التخصص واجد عجيب و يجنن اني في البداية رحت تجاري ونقلت علمي و رديت رجعت تجاري لان حسيت تعودت على المواد و المعلمات و اسهل حقي من ناحية فهم و دراسة الفصل الثالث واجد عجيب من ناحية مواد المال عبارة عن مادة ٤ ساعات ينجاب فيها ١٠٠ ببلاش لان عبارة عن معادلات حسابيه بس بالانج و المعلمات مايقصرون يشرحون كلشي بدقة و يفهمونا الموضوع، الجود مادة حفظ تشبه الثقف بس مو مثل مواضيعه الجود يتكلم عن الجودة و مقاييسها ومعاييرها، الادر كنت مو حابة تجاري لانه بالانج الا انه عقب جم حصة ادر اكتشفت انه واجد واجد واجد سهل نترجم الكلام اللي بالانج لعربي و نفهمه و نحفظ و بس و المادة صدق عجيبه بأختصار الفصل الثالث واجد عجيب و يرفع المعدل، الفصل الرابع مواد ساعتين تكون اكثر عدنا تأمين مادة خفيفة و تنحط على القلب و عدنا بعد قانون مثل الشي بس ادسم شوي صايره من التأمين و الادر مثل الفصل الثالث لكن في شوي صعوبه في الاكاونت كان لان عباره عن جداول و يمكن لان مادرسناه عدل بسبب وضع كورونا وبس والله نتمنى ان توجيهي تكون مواد تجاري فيه سهله و بسيطه و ترفع المعدل بعد، التجاري مو سهل ولا صعب كل واحد واجتهاده و تعبه اللي بيدرس عدل بجيب عدل واللي لا حتى رسوب عادي يرسب التخصص حاله حال كل التخصصات بس مع دراسة اول بأول و انتباه لشرح المعلمات بكون تخصص سهل

  35. commbh –

    تخصص حلو وممتع و استفدت وايد اشياء منه في البداية كنت مترددة عقب دخلته وحبيته وايد وحبيت الدارسة بالانجليزي اكثر من العربي ولكن بشكل عام انصح اي واحد يسألني عن تخصصات المدرسة

  36. commbh –

    “تخصص العلوم التجارية تخصص جِداً جميل ولا يجعل الطالب يعرف الحياة من الجانب العلمي فقط بل الجانب العلمي و العملي والحياة الاجتماعية من خلال هذا التخصص من الممكن ان تتكون عند الطالب معلومات كثيرة عن البيئة اللي حوله والشركات ، والتأمين، وقوانين العمل ، والحسابات وغيرها
    التخصص كما ذكرت جِداً جميل ، ولا تظنون ان تجاري سهل ولا يحتاج الى دراسه مثل ما هو شائع عند الناس ، يدخلون التخصص عشان ما يحتاج دراسه ، ولكن هو بالعكس يحتاج دراسه وكلما كانت اول بأول كانت أفضل خصوصاً في مقررات التي تعتمد على الحفظ اكثر من الفهم وهم الجودة ونماذج التميز وايضاً الاقتصاد
    اما التخصصات التي تكون باللغة الانجليزية فهي في غاية السهولة ويحصد الطالب فيها غالباً على درجات عالية ،اذا تم معرفة الكلمات المفتاحية للمقرر و ايضاً تم فهم المقرر جيداً .

    “

  37. commbh –

    تخصص تجاري تخصص فعلًا ما ندمت ان دخلته ممتع ومواده حلوة تجمع بين الحفظ والفهم والانج سهل وينقدر عليه إذا حطوا بالهم لشرح المعلم/ة بيركز في بالهم الشرح بالمعنى وبعدها الحفظ بيكون سهل ومادة الادر في الامتحانات يمشون على الفهم لأن لغة الانج اللي فيه واجد سهلة عكس إذا كان الادر بالعربي شوي بيستثقلونه لكن بعد ينقدر عليه واساسًا اذا كانت عندهم رغبة في التخصص لا يترددون ولا لحظة ..أول كورس بياخذون مال هذا فعلًا إذا حطوا على روحهم فيه بيجيبون 100 بالساهل والمحاسبة من أحلى المواد يعتمد على الفهم ولازم تركيز عشان ما تضيع درجاتهم وباقي المواد بالعربي وحفظ دسمة شوي لكن بتكون عليهم سهلة في الحفظ إذا درسوها أول بأول .. وحساب أستاذ إبراهيم أمان مرجع قوي ما راح تضيعون بيساعدكم وخاصة في فترة الامتحانات راح تتذكرون في الامتحان ان أغلب الأسئلة اللي يطرحها في الكويزات اللي يسويها في برنامج كاهوت تجي في الامتحان😍 يعني اذا حليتوه بعد مراجعتكم وركزتوا في الأسئلة أضمنوا الدرجة العدلة .. في النهاية اللي يدخل التخصص برغبة بيبدع فيه وأتمنى لهم التوفيق ويا رب يتخرجون بالمعدل اللي يحلمون فيه ✨❤️.

  38. commbh –

    اولا التخصص لازم يكون عن رغبة و من اختياركم الشخصي، بالنسبة لي احب المواد التجارية و تمتعني و هاي شي مهم عشان ما تستملون و انتون تدرسون، التخصص كباقي التخصصات يبي له دراسة اول باول عشان يصير اسهل و في مواد سهله و في مواد ثقيلة و هاي يختلف من شخص الى شخص ف لازم تعرفون نقاط قوتكم و نقاط ضعفكم و تكثفون الدراسة على المواد الي مو فاهمينها. التخصص يعتمد على الرياضيات و الانجليزي و هاي المواد تتفرع بعدين في المحاسبة و باقي المواد. بكون في كلمات ما بتفهمونها و يمكن تستثقلون تحفظونها بروحها و لكن مع الممارسة و حل التمارين بتعرفون معانيهم. المتعة في الدراسة واجد مهمه لان عند وقت الدراسة ساعات كنت استثقل ادرس و لكن لين ابدي استمتع بالي ادرسه.الملخصات بتساعدكم و لكن لازم تتاكدون انه نفس منهج الكتاب (ابحثوا عن ملخصات استاذ ابراهيم حسن امان). تنظيم الوقت مهم ف لازم يكون وقت للعب و الاشياء الي تستمتعون فيها و وقت للدراسة. كنت انظم وقتي اني اصلي في المدرسة (غالباً في حصص الفراغ الي عند الاذان فاستاذن و اصلي ) و ادرس مثلا الى الساعة 6:30 دراسة و الباقي لراحتي ليي الخيار اطالع فلم او اسوي اي شي يريحني في ذاك الوقت.ممكن تسمعون الناس تقول التخصص سهل و يعتمد هاي على حسب الميول ف الطلاب الي يحفظون يروحون ادبي لان اغلب المواد حفظ و نفس الشي الى التجاري و العلمي .في النهاية لازم تتعرفون على نفسكم و تعرفون شنو يناسبها و يشجعها و شنو تحب.

  39. commbh –

    تخصص جميل وممتع ف نفس الوقت للامانه انه قبل كنت مخططه ادرس ادبي بس تالي هونت ودشيت تجاري حمدلله ما ندمت استمتعت بدراسه كل ماده فيه ولله الحمد المواد بالنسبه لي كانو كانو سهلين يمكن لان حبيت المواد فصرت اجوفهم سهلين قبل لا ادش تجاري كنت خايفه لان مب زينه ف الانقلش و الريض بس حمدلله كلللش ما كان صعب لهدرجه الانج والريض درستهم اول باول وصارو وايد سهلين اما بالنسبه لمواد تجاري كانو بالنسبه لي خفيفين ووايد حبيتهم حمدلله ارتفع معدلي بعد لان حصلت ف ااغلب المواد درجات وايد عاليه

  40. commbh –

    بقول رايي بكل صراحة اني توقعت ادش تجاري واطلع منه بندم ولو كان ضئيل بس ولا ذرررة ندم صدقوونيي هو متعة هو ثقافة هو كلشي مكس لكل شي يجمع بين الحفظ والفهم معلومات حياتية صرت متطلعة للحياة بشكل اكثر يعني وايد وايد فادني في حياتي طبعا لازم فيه تعب لازم فيه جهد بس ما بتحسون انكم تدرسون شي بس حفظ وتقديم امتحان ويلا لا الاشياء الا بتتعلمونها بتغير نظرتكم للحياة وتخليكم اكثر ادراكًا للحياة من جميع الجوانب هذا رايي بكل صراحة والحمدلله دائمًا وابدًا اني اخترت هذا التخصص والله يوفقكم ان شاء الله❤️

  41. commbh –

    المواد التجاريه وايد سهله بشكل عام بس يبي لها دراسه وجهد و تحديد الهدف عشان الشخص نفسه يوصل حق الي يبيه واتمنى الكل التوفيق

  42. commbh –

    “نسبتي في أول ثانوي كانت ٨١ وتخرجت بتفوق، سواء اللي داشين التخصص عشان يرفعون معدلهم ولا رغبةً منهم، بتحبونه! و١٠٠٪؜ إذا شديتون على روحكم بترتفعون ما عليكم من اللي يحبط ويقول المعدل ما يرتفع إلا بوينتات. المواد أغلبها ممتعة حتى الثقيل منها ومن تجربتي وأغلب اللي حولي ثالث كورس (أول سنة تخصص) كان أحلى كورس بمسيرة الثانوي كلها مع أن ما كان عندنا معلومات إلا من كتاب الثقف، اللي يمكن تحسونه حشو معلومات وثقيل على البعض لكن هالكتاب بيتقسم في كل مادة بتشوفون شوي منه وبتتذكرونه بالخير.
    1. المواد اللي بتصير بالإنج لا تشيلون همها (ادر*فصلين) ما منه خوف، من أسهل المقررات وأحلاها متأكدة بتفضلونه على المواد اللي بالعربي مثل الجود ولا ادر آخر كورس، لغته سهلة بسيطة وجدًا مقدور عليها. بالنسبة إلى الـ (مال+محا*٣فصول) ذلين مجرد مصطلحات تجارية كلنا كنا نجهلهم وتعرفنا عليهم شوي شوي وصاروا مألوفين عندنا بالممارسة وبعد المعلمين ما يقصرون بيترجمون كل شي بس أهم نقطة أبدًا لا تستحون تسألون حتى لو عن معنى كلمة ما، سؤالكم غالبًا بيكون في بال نص الصف وكلهم ساكتين فكونوا مبادرين وبتفكون أزمة بيتلطف الجو وبينكسر حاجز الحياء اللي ماله داعي وكلنا بندعي حقكم والله.
    2. افهموااا الدروس عشان تقدرون تحفظون بسرعة أكبر.. خير وبركة إذا قدرتون تلخصون وتراجعون بعد أو أثناء كل درس لهالمواد إذا عندكم الوقت والقدرة (جود، تأمين، قان، قصد، بنك، بيع، ادر) وإذا ما عندكم الطاقة، حتى مجرد القراءة السريعة بتركيز بعد الحصص بترسخ المعلومات في مخكم. إحنا كان عندنا تسميع إجباري وعلى كثر ما كنا نتضايق ونتطنز وإحنا نحفظ “”شصاير؟ شهالبدائية؟ ابتدائي إحنا؟”” إلا إن الدراسة للنهائي والمنتصف كانت يسيييرة وسهلة وحمدنا ربنا عليها ألف مرة.
    3. المال خفيف لطيف والمحاسبة كذلك وكأنهم لعبة بس لا تستهترون إذا قالوا لكم اخذوا القاعدة وطبقوااا طبقواا طبقوا لين تتقنونها وتتعودون على المصطلحات مثل ما قلنا لأن هذي طريقة الدراسة الصحيحة الدراسة النظرية لهالمقررات ما بتفيدكم.
    4. أي شيء ما تفهمونه ولا على قولتنا “”المعلمة ما تعرف تشرح”” ما عليه لا تعتمدون عليها بشكل كلي اسألوا زملائكم ساعدوا بعض تعاونوا عشان مصلحتكم + ارجعوا لموقع أستاذ إبراهيم أمان وخلوه رفيق رحلتكم + اكتبوا رمز المقرر يوتيوب بتحصلون شرح وافي لأن أغلب الدروس مرتبطة ببعض عشان ما تضيعون.
    5. وأخيرًا، اعتذر على الإطالة ويمكن تكون نصائحي مكررة لكن حطوها بعين الاعتبار وايد بتفيدكم.. مقرراتنا منطقية وواقعية حتى في النقاشات من حولكم بتمر عليكم معلومات درستونها فاستمتعوا وأنتوا تدرسون لا تسمعون للسلبيين وحببوا روحكم في الدراسة. لنفسكم عليكم حق، عطوها حقها الحين تقدرون تستانسون وتستثمرون العطلة وتستفيدون منها بمثل الوقت في كورسات اونلاين مجانية مرتبطة باللغة عشان تقوون الإنج عندكم أو مثلًا تكسبون خبرة في المحاسبة ومهارات أخرى بتنفعكم مو بس بالدراسة بعد على المدى البعيد من مواقع عربية مثل (إدراك+إدلال+رواق) وعليها شهادات، اعتمدوها وبتحسون بالإنتاجية والرضا وبالتوفيق جميعًا. ❤️”

  43. commbh –

    قبل لا ادش تجاري كانوا يخوفوني ان كله انجليزي وجي عقب قلت انا بدش لان انا حابة التخصص وبدا يرتفع معدلي كل فصل لان دشيت تخصص انا ابية واعرف ان راح ابدع فية ما دشيت التخصص لان اهلي يبون اهم شي اكون حابة التخصص وطبعا شكرا جدا من اعماق قلبي حق استاذ ابراهيم لان كان يحط اختبارات سابقة وملخصات الي هي كانت السبب الرئيسي لارتفاع معدلي ♥️

  44. commbh –

    تخصص جميل جدا و معتدل بالنسبه لباقي التخصصات يلي فيها مواد مكررة .. و عن نفسي اول مارحت ثاني ثنوي و تخصصت تجاري حسيت لاول مرة إني قاعده ادرس شي احبه بما إني ماكنت مقتنعه بالتخصص و غير هذا حق يلي يبي يرفع معدله انصحه يتخصص تجاري

  45. commbh –

    لحد يقص عليكم ويحبطكم او يقول ليكم ان تجاري للناس الي مايفهمون او شي بالعكس التجاري تخصص جداً جميل وممتتع جداً ومفيد حتى في الحياة اليومية وااجد بتستانسون فيه وخصوصاً هي فرصة لرفع المعادلات حق اللي معدلاتهم نازله

  46. commbh –

    “تخصص جميل ويفتح لك كل المجالات ماعدا التخصصات الطبيه وانا توني رايح ثاني ثانوي تجاري وانا مغمض لانه اول شي احبه وثاني شي
    بفيدني في حياتي اكثر وبقولك اذا كان مستقبلك غير الطب لا ادش تجاري انا اذا بتخصص في الجامعه اي شي غير الطب حياك تجاري “

  47. commbh –

    التجاري واجد حليو وممتع والمواد فيه متنوعه فيه الحفظ والفهم ، الحفظ مو مهم واجد لانك اذا فهمت ما بتحتاج تحفظ ، كل مقررات الريض سهلة حتى اسهل من (١٥١ ، ١٥٢ ) ، التجاري مايحتاج تكون نابغه في الانقلش لانه كل المصطلحات تكون متعلقه في التخصص والمواد بتتعلمها وبتحفظها من زود التكرار في الحصص يعني عادي تكون بربرة في الانج اذا بتدخل تجاري ، المواد بشكل عام خفيفه وما ينشال همها بس مو معناته تهمل وما تدرس ، هل التجاري يرفع المعدل ؟ اي بالراحة اني كان التراكمي مالي ٩٠ وقدرت اوصله الى ٩٤.٩ ( لكن ويه الدراسه عن بعد كل طلاب وحد قفز معدلهم فوق بمرة وحده ومو الكل هذا مستواه ف السؤال هل بيرتفع اذا دخلوا تجاري بعد ما ترجع الدراسة في المدارس ؟ هالشي يعتمد ع الطالب اذا حافظ على درجاته ومستواه ) خلاصة كلامي * عادي ماتعرف انقلش * عادي ما تكون شاطر ذبحة في الريض

  48. commbh –

    تخصص جداً حلو نفس مايقولون” اذا حبيت الشي بتبدع فيه ” وحده سهل 🥰

  49. commbh –

    موادنا حليوة و سهلة و خفيفة و لازم من البداية ننتبه ليها عشان نقدر نواصل فيها و مادة المحاسبة من اول مقرر لازم ننتبه ليه لان بناخذ بعد مقرر في توجيهي بنكمل عليه و التخصص ممتع و حليو👍🏻💜💜💜.

  50. commbh –

    تخصص التجاري جدًا جميل وسهل اذا بتتعبون على روحكم وبتدرسون كل فصل في تخصص تجاري احلى من الثاني لا تضيعون عليكم درجات وارفعوا معدلكم ترى بسرعة يرتفع خصوصًا اول فصل تجاري و ماعليكم من اللي يقول الأدر صعب ترى سهل حتى لو بالانج سهل ويجيبون الامتحان سهل بعد

  51. commbh –

    التخصص جداً خفيف ومافي اي صعوبه تواجهها يمكن الاكاونت فقط الي يبا ليه تركيز وبالتوفيق للجميع

  52. commbh –

    تخصص جمييييل وممتع..كنت لآخر سبوع قبل الدوامات متحيره تجاري وله علمي .. ورحت نقلت تجاري وكلششش ماندمت صراحه ، من ناحية الدراسه كل شي نتعب فيه ونعطي فيه من قلبنا بنحصل عليه الي يرضينا ، ولحد يقول رياضيات وانقلش وصعب لأن الاكاونت والمال كلش مو بصعوبة الريض الي درسناه من قبل بالعكس تحسون بمتعه وانتون تدرسونه جدددًا سهل لما تحطون فيه صدق ، الانقلش مصطلحات جدًا سهله وتكون عارفينها من قبل والمعلمات واجد يساعدون ويسهلون علينا اني كلش مو فلته ف الانقلش بس الادر عندي ماينزل من التسعين لأن سهل سهل سهل سهلللللللل واخر شي كل شي بتحصلونه على حسب جهدكم وتعبكم والتوفيق من عند الله .. انتون جاهدوا وبتحصلون بأذنه 🤍 نتمنى ليكم كل التوفيق ولاتخلون احد يعكر ليكم دا صعب وداك صعب لأن كل شي تحطون فيه وتبدعون فيه بيسهل عليكم 😡😡😡

  53. commbh –

    الصراحة التجاري من افضل التخصصات في المدرسة و تخلي الشخص يستانس وهو يدرس المقررات… هنيئاً لمن اختار التجاري

  54. commbh –

    نصيحة انتبه وية الاستاذ ما بتحتاج تدرس في البيت ولا عليك من الي يقول تجاري واجد انج انا مستواي جدا سيئ في الانج بس تعرف المصطلحات بتنجح و ببتفوق خصوصا المحاسبة المال انتبه الى الشرح ادرسني استاذ ( نصيحة الى في العمران تجربة الي درسوني الاستاذ القدير حسين البقالي واستاذ مهدي حسن مرهون بس انتبه وتفاعل ببتفوق ( ونسالكم الدعاء ) )

  55. commbh –

    المواد التجارية بشكل عام واجد حليوه و بتحسونها من واقع الحياة في بالانج (مال،اكاونت،ادر) بس مو صعب بالعكس تقدرون تجيبون ١٠٠ فيها و عندنا اللي بالعربي(جود،تام،قان،بنك،ادر”المقرر في بالعربي و الادر و كل واحد يختلف شوي عن الثاني”!و غيرها من المواد)بتكون تعتمد على الفهم و الحفظ و سهله بعد التخصص واجد ممتع

  56. commbh –

    تخصص جميل جدا و ليس صعب بل يحتاج قليل من الجهد

  57. commbh –

    بشكل عام المواد التجارية صعبه اشوي فا تحتاج إلى انعزل وقت ادرسه و تحتاج الى تركيز لان اذا ما ركزت ما بتفاهم و بتقول صعبه بس اذا فهمت بتكون عليك سهله

  58. commbh –

    التخصص اول شي واجد عجيب وممتع لحد يسمع كلام الناس المحبطين فيه انج وفي ريض ترى المواد مالتنا عجيبه وسهلة وممتعة وكلها من الحياة يعني على سبيل المثال عندنا مادة مال اول فصل هذي المادة انج وحسابات لكن بسهولة تقدرون تجيبون 100 بس عليكم تحفظون الكلمات المفتاحية والقوانين اما الادر فهي مادة سهلة عليكم تحفظون الكلامات اول بأول وترى واجد سهلة الامتحانات مالها والانج اللي فيه سهل اما المحاسبة اذا ركزتون في اول مقرر مال محاسبة وحفظتون الكلمات خلاص كل المقررات بتصير سهلة عليكم وخصوصا اخر مقرر بسهولة 100 تجي يعني اني كل المقررات مال المحاسبة جبت فيها 99 او 100 والادر اخر واحد بالعربي واجد سهل بس يعني احنا تعودنا على اللي بالانج لكن اخر واحد بعد سهل اما مقرر التأمين كله من الحياة والواقع ويعتمد على الحفظ اول بأول اما القانون نفس التأمين وكله من واقع الحياة فالتجاري واجد تخصص ممتع انته بنفسك تقدر تبدع فيه يعني لو يرجع الزمن بعد بختار تجاري ويعني ابدا ما ندمت بالعكس الحين اني في المدرسة كل معلماتي مال التجاري يعرفوني ليه اسم عندهم ولاني احب التخصص اشتغلت بنفسي علشان الكل سويت ملخصات وموجودة في موقع التجاري فالي بيدخل تجاري دايما يكتب ويتذكر في كل وقته ان #التجاري_قدها وانتون قدها اتمنى للكل التوفيق وسامحوني على الاطالة

  59. commbh –

    “بالنسبة حق اللي يدشون تجاري
    اني دايما اشجع الناس ع انهم يروحون تجاري
    طبعا كل واحد وميوله واللي يحبه

    لازم يدخلون التخصص اللي هم يحبونه ويحسون راح يبدعون ويتميزون عن غيرهم ف الصف او ع الدفعة ف التخصص
    شكثر ناس يدخلون تجاري ع انه سهل ومن هالكلام وعبالهم ان علمي الصعب بس
    صح علمي يبيه له جدية و اهتمام كبير

    بس كل تخصص يبيه اهتمام وتركيز ودراسة اول باول واعطاء من كل قلب
    سواء علمي او تجاري او ادبي مافي شي سهل
    وما في شي يجي بكل سهولة لازم تعب عشان نحصل اللي نبيه

    البعض يقول ان كل بالانج ومن هالكلام بالعكس هذا شي يميز تجاري عن باقي التخصصات و تتطور اللغة عندنا وشي طبيعي بتشوف ف البداية العصوبة لان مو متعودين ندرس شي وكلمات جديدة بس المعلمة تترجم وما تقصر وحلو نتلعم كلمات جديدة ونمارسها ف حياتنا

    اني عن نفسي دخلت تجاري بمعدل ٨٤ بسبب عدم جديتي من البداية لذلك انصح الكل ان يتهم من البداية .. وكنت اقول عادي بتفوق مثل ما تخرجت من اعدادي بتفوق
    بس الصدمة يوم شفت درجتي وشلون الامتحانات واحتساب الدرجات

    المهم دخلت تجاري بكل حب … وعندي هدف ان اتخرج بامتياز … وكنت ادرس اول باول لاول مرة ف حياتي
    وكنت كل عبالي ما منه فايدة هالشي … مع ان ع طول امي تقول درسي اول باول ومن هالكلام
    تالي قمت ادرس اول باول … بعد ما اخذ الدرس … وتالي حق الاختبار … وما يجي المنتصف الا اني حافظة الدرس والاهم اني فاهمتنه ويصير جداً سهل ويساعد ع نخلص من وقت بسبب ضيق الوقت حق الدراسة
    واغلب المقررات بس عصرية للامتحانات ف يصير ضغط

    ولاحظت تغير كبير ف شخصيتي ودرجاتي وميولي من بعد صدمة درجتي ف وحد
    واجد اهتميت واصريت ع اللي امبيه
    كنت ع طول ادرس حتى ف الوينكد
    وسويت مذكرة اني وصديقتي وحطينها ف الموقع عشان الكل يستفيد … لان كنت اللخص وادرس من اللي اكتبه … وقلت ليش م اخلي الناس تستفيد … واحصل اجر … وبتلاقونها في موقع ابراهيم امان

    طبعا مو كل الوقت دراسة لازم يكون تنظيم حق كل شي … عادي كنت اطلع واستانس مع اهلي وربعي
    لازم يكون في موازنة حق كل شي … عشان حياتنا تكون منظمة

    وقمت اتفوق في تجاري .. ودرجاتي عالية … وصرت متميزة … وكل المعلمات يعرفوني..
    وللامانة اذا اقول معدلي ف الثمانيين ينصدمون ان شلون وجذي
    الشي يضايق اي … بس زاد اصراري ان بدخل وبرتفع … قمت كل كورس ازيد من بين ٣ الى درجتين … صار تركزي اكثر ع دراستي

    والحين اني متخرجة ومتفوقة … وحققت اللي امبيه ورفعت راس امي وابوي بتفوقي
    وبس يعني ما نبي نطول اكثر … بس تخصص تجاري جداً ممتع ومفيد لحياتنا … نعرف اشياء … وقوانين … وكل شي من واقع الحياة
    شلون نحسب ونشوف المزانية والضريبة … وقانون العمل والتامين والاقتصاد والبنوك
    واجد مفيد وحلو وممتع ف الدراسة❤️

    لو بعد يقولون حقي شنو تبين تدخلين ف ثانوي اروح تجاري واني مغمضة”

  60. commbh –

    المواد سهله وجميلةومو ممله خصوصا المحا والمال والبنك..وفي بعض كريهه بس بعض الاساتذة يحلون ليك المادة

  61. commbh –

    “تخصص التجاري تخصص جدا حلو وممتع اذا كان الشخص يميل حق العمليات الحسابية و البزنس بشكل عام، انه عن نفسي كنت احب عمليات الحسابية و لغة الانجليزية و دخلت التخصص لهذا السببين.. المواد كانت واايد حلوة خصوصا مال و ادر و اكاونت تحس روحك تستمتع وانت تحل و الحمدالله موقع commbh ساعدي من اول ما دخلت التخصص الى ما تخرجت. يحتوي على كل شي ممكن تحتاجه فالتخصص.
    اذا انت متحير ادش تخصص التجاري، ادرس نفسك، هل تحب العمليات الحسابية؟ تحب الاشياء اللي تتعلق بالتجارة؟ هل عندك الارادة و العزيمة انك تبذل جهدك؟
    تخصص التجاري عمره ما كان سهل حق اللي مو حابه و داخله عشان يرفع المعدل، مافيه تخصص في هالدنيا تدشه و تتفوق و تنجح بدون ما تبذل جهد، المواد حلوة نعم ولكن تحتاج اهتمام منك عشان تجيب علامات حلوة.
    في تجربتي، عمري ماحسيت ان اي مادة من مواد التجاري صعببة و اعجازية، كلهم الحمدالله حلوييين و مو صعبيين بس خلو بالكم اول بأول عشان ما يصعب عليكم شي خصوصا اول فصل لكم راح تاخذون اساسيات مواد التجاري تساعدكم حق الفصول الجاية.
    ما ندمت ولا لحظة اني دخلت تجاري و الحمدالله انه الحين خريجة متفوقة من تخصص العلوم التجارية ❤️
    “

  62. commbh –

    “المواد التجارية بشكل عام نفس باقي التخصصات يبي ليها فهم وفي نفس الوقت حفظ تقريباً كل المواد ممتعه وبالخصوص المحاسبة والناس الا تقول ان الا مايعرف ريض وانج مايمشي هذا كلام غير صحيح لان الإنسان اذا كان يبي الشيء يقدر يوصل له، وعن تجربة اني دخلت والكل كان معارض فكرة ان ادخل تجاري لكن الحمد لله وايد حسيت ان فرق يوم دخلت تجاري لان قمت ادرس أشياء احبها ماكنت متوقعة ان بحب المحاسبة وبقايا المواد يوم من الأيام و كنت متخوفة من الكلام السلبي ان الا مايعرف انج وريض مابكمل ونصيحتي أدخلوا شيء تحسون بتبدعون فيه مو على ان سهل او مافيه ريض
    وكفكرة عامة عن المواد مابتحتاجون تدرسون وايد للمنتصف والنهائي اذا درستون حق الاختبارات الشهرية وشرح المعلم هو الأساس وبالتوفيق جميعاً❤”

  63. commbh –

    كأي طالبة سنة اولى توحيد كنت مترددة شنو ادخل تخصص، خصوصا ان هالشي راح يحدد من احين مستقبلي الجامعي ..حاولت اكتشف ميولي ولكني ماقدرت لان ميولي مالها علاقة بالتجاري او الادبي او العلمي ولكنني قررت ادخل تجاري لاني كنت ابي اتعلم شي جديد واعرف اكثر عن المحاسبة والبزنزس ، ماندمت ولا يوم اني دخلت تجاري بالعكس حمدت ربي دائما اني اخذت اكثر قرار بيفيدني في حياتي ، التجاري ابدا مو صعب ولكنه يحتاج انك تدرس وتفهم واذا مافهمت شي لاااازم تقول حق المدرس عشان يشرح لك النقطة اللي مافهمتها ولا ترى بتتراكم عليك الاشياء اللي مو فاهمها وبتتوهق لما بتيي تدرس للمنتصف او النهائي ،والصراحة معلمين التجاري مافي اطيب منهم وتحسهم يهتمون لكل طالب ويحبونه حتى لو كان مشاغب ، لكل اللي جايب في الثمانين او التسعين في التراكمي انصح وبشدههه يدخل تجاري لانه راح يرفع معدلك بشكل ماتتصوره وراح تتفاجئ من روحك وقدراتك ، واللي حبيته في التجاري وخصوصا في مادة الاكونت او المحاسبة انها راح تحرك مخك وراح تخليك تفكر بذكاء وكذلك حق المواد الثانية ، نصيحتي لكل الحيرانين اذا انت طموحك في المستقبل انك تفتح لك بزنزس او انك تفهم في التجارة ولو شي بسيط او انك تشتغل في شركة او حتى انك حاب تنمي روحك في هالمجال فهذا مكانك ..وبالتوفيق.

  64. commbh –

    تخصص التجاري اولاً واجد مطلوب وخصووصاً في البحرين لان البحرين تجاريه وثانياً تخصص التجاري حليو لان مو بس احفظ واكتب لا في ارقام في اشياء واقعيه احنا نسويها ومانعرف لها مثلاً الحين بتروح تفتح حساب في البنك ماتعرف شتسوي بس التجاري يعلمك ،، بتروح تشتغل ماتعرف قوانين العمل والتخصص يعلمك ف الشي جداً ممتع وحليو لان من واقع الحياه انت تدرس شي بتطبقه بعد ماتتخرج واختاري كان في محله ماندمت ابداً اني اخذت تجاري وفي الجامعه ان شاء الله بعد بكمل على دراسه الثنوي وبدخل اكاونتنق .

  65. commbh –

    انصح كل اله مشاكك انه يدخل تجاري دخلو لانه واجد راح ارفع المعدل وتخصص عجيييب ما تحسون بملل وممتع كانكم داخلين تحدي مع ربعكم حده عجيب #تجاري_قدها

  66. commbh –

    مواد خفيفه لطيفه تندرس بكل حب حرفيًا تجاري مو يعني انقلينزيه قويه ، مواد خفيفه تجنن و لا سيمآ المحاسبه ❤❤❤❤❤❤❤

  67. commbh –

    تخصص التجاري جدًا جميل ورائع، ولكن الكثير من الناس ماخذين انطباع إن التجاري مال ناس كسالة ومايبون يدرسون ويتعبون روحهم وهذا جدًا غلط، التخصص فيه السهل وفيه الصعب وبدون جد واجتهاد ماراح تحصل شي عدل.. والكثير من الناس يدخلونه حق يزيد المعدل ولكن هم مايميلون له إذا ماتميلون للمواد التجارية لا تدخلونه لأن مابتبدعون فيه ولكن ممكن تحبون المواد وتحبون المواد التجارية عقب في النهاية تخصص جميل جميل ويفتح لك الكثير من الأبواب في الجامعة تقدر تتخصص كل شي حتى في كلية العلوم الصحية الشي الوحيد الي ماتقدر تدرسة هو الطب وشكرًا.. أتمنى للجميع التوفيق❤️

  68. Baynat –

    صقق م ندمت اني دخلته موادة سهلة وحليوه تحتاج الى الفهم والدراسة والحفظ والتركيز وي المعلمه يعن مو نشغل الحصة ونهرب او ننام بس عشان نسجل حضور هذا م يصير في كل تخصص مو بس تجااري وكل واحد بيحصل الدرجات الي يستحقها ولازم تكونون مهتمين في المواد التجارية مو اي قالو تجاري سهل وبعدين اوه طلع صعب تجاري لو زين م دخلت وانتون اصلن م تدرون بشيء هذا م يصير ولازم تكونون حاطين هدف احنى لوين نبغى نوصل او الى وين ابغى اوصل وهو في كل تخصص مو بس تجااري او بشكل عام في الحياة لازم في شيء صعب مو كل شيء بيي سهل لازم احناا نتعب عشاان توصلون للي تبغون توصلون إليه عشان يتحقق الحلم والرسول(ص) قال: العلم نور والجهل ظلام. ومن جد وجد ومن زرع حصد…. 😎 الم الدراسة لحضه وينتهي لكن اهمالها الم يستمر مدى الحياة من لم يصبر على ذل التعلم ساعه بقى في ذل الجهل ابدا💞💞 بالتوفيق للي بيدخلون المقرر الحليو💞💞

  69. نور –

    التخصص ممتع يعلمك اشياء حياتيه و مافيه صعوبه في شي حتى الانج سهل و مو كل المقرارات بالانج بس في شي واحد صعب بس مو الصعوبه المبالغة الى هو المحاسبه ذا شوي يبي له تركيز لكن كل المقرارات تيننن و ماندمت و لا لحظة اني دخلته خصوصا انه يدخل كل المجالات بس الطب لا ف الى يفكر يدخل التجاري لا يتردد

  70. Mohammed Ali Alhayki –

    قبل كل شيء ، تخصص التجاري تخصص حاله حال أي تخصص آخر ، ليش اختار التجاري؟ و لماذا؟ هذا السؤال من المفترض الشخص يسأله نفسه ، هل عندي ميول اتجاه التخصص؟ او لأن فلان راح و فلان قال و و و
    التخصص كالآتي يحتوي على المواد التجارية مثل القصد و المال و الاكاونت و الجود و الأدر و غيرهم من المواد ، كتجربة طالب خريج تجاري استمعت بكل لحظة في هذا التخصص و دخلته عن قناعة تامة ، اول شي بقولونه ليك فئة من الناس خصوصًا اذا كنت طالب و معدلك مرتفع : دخلت تجاري لأنه اسهل صح و ما فيك شدة العلمي و و و ، المهم انه كلامه تنقيص من التجاري
    تجربتي كانت كالآتي استانست في التخصص ، معلمين غنيين عن الوصف (بالنسبة لمدرستنا) و بالنسبة ليي افضل قسم من ناحية المعلمين ، معلمين المواد التجارية ، التخصص ككل ممتع اذا حابنه و ميولك اتجاهه بتستانس ، ما ندمت اني ادخل تخصص التجاري مع انه عندي الامكانية اني ادخل علمي ، و لكن ميولي مو اتجاه العلمي و المواد العلمية ، نصيحتي لا تحارب ميولك عشان شخص قال ليك : لا الفرص للعلمي اكثر و العلمي يفتح ليك ابواب و و ، شسوي في الابواب الا بيفتحها انا ، ميولي اتجاه التجاري هل بجي يوم بدرس طب مثلًا ، اكيد لا ، نصيحتي للكل ادخلوا تخصصاتكم عن قناعة لا تطالعون مستواكم الاكاديمي و وين بمشي و وين لا ، في حال تحب هالشي واصل ما دام الفرصة موجودة ، لا تدخل شيء بالإكراه و الإجبار و بآراء الآخرين ، ابدع و كن انت.

  71. آلاء جعفر احمد -جامعة البحرين ❤️‍🩹. –

    للامانة .. التجاري تخصص اجمل من الجميل .. تخصص م بتلاقون مثله .. تخصص ياخذكم ل عالم حلو .. اول م كنت بدخل تجاري كان الكل معارضني في هالقرار ، التجاري م له مستقبل ، والتجاري م يمشي ، التجاري يطيح المعدل .. لكن الاصرار في القرار خلاني اكمل على التجاري وم اتراجع بتاتا .. ودخلت التخصص واني كلي امل في اني بنجح .. المواد كانت بالنسبة لي ممتعه وحلوه بدون اي مبالغه م كان فيها صعوبه المبالغ فيها .. كانت سهله وسريعه الفهم واذا كنت مركز تفهمها سريع والمعلومات م تروح من ذاكرتك .. اول فصل في التخصص ارتفع معدلي بشكل ملحوظ .. وكان لا زال في تحطيم من قبل البعض .. بس الاصرار والعزيمه والدافع الداخلي خلاني اكمل .. وفصل عن فصل لين م ارتفع معدلي ووصلت لمعدل يرضي نفسي وبينت للي كانوا معارضين لفكرة التجاري انه تخصص جميل ومواده فخمه واليوم اني ادرس سنه ثانية جامعة ولا زلت اقول ان تخصص التجاري تخصص جداً جداً جميل ، تخرجت الحمدلله ووصلت الجامعة وانصح اي شخص يفكر يدخل تجاري لا يتراجع بتاتا ، لانه تخصص جميل ❤️‍🩹.

  72. كوثر الشمري –

    قصتي باختصارها ف جم سطر ، بغيت ادش ادبي وخلاص حطيت اني ابي ادبي قبل جم يوم من الدوام جان افكر هل انا باستمتع فالمواد ولا بس جذي ، قمت ثاني يوم حولت تجاري ، وبصراحه كان احلى قرار ، مواد تينن وتحمس واحسها صايره ممتعه لان في جزء كبير منها صاير من الحياه الواقعيه والمعلومات مب الي تغث وتملل ، بلعكس المقررات جنها لعبه بس نفهم الفكره وعقب بنبدع فيه ، كان احلى قرار اتخذته ف حياتي ، وصج الي يبي مقررات تونس يدش تجاري ، وبغيت اشكر معلماتي معلمات التجاري ف مدرسه الحد الثانويه للبنات ولا قصور ف باقي الاقسام لان بدون مجامله معلمتنا لو باشكرهم من اليوم لي باجر ولا باوفي حقهم ، وابي اقولهم سر تميزنا انتوا ، لانكم تبارك الرحمن معلمات متمكنين من المقررات الي تشرحونها ♡

  73. ZHANG ZHONG YE –

    أنا حاليا في الثالث الثانوي التجاري و التخصص التجاري لا يكثر فيه الحديث، ولكنه عميق جداً بمادة الرياضيات، فكل المقررات تقريباً يوجد بها حسابات وأرقام ، وإن بعض المقررات التخصصية تكون باللغة الإنجليزية .

    على الطالب التمهل والتفكير في مستقبله الدراسي فأنصح الطلاب بأن يسارعوا في التفكير ، من دخوله المرحلة الثانوية وعدم الإنتظار ليتم تسليمه إستمارة التخصص وحينها يفكر ، ولكن ايضاً عليه النظر للمواد التي يدرسها والتي ستوجهه لتخصصه بما ان السنة الأولى يعطى الطالب كل المواد (موحد ) وينظر ايما المواد يفضل وايها لا يفضلها.

    في النهاية انصح جميع الطلاب المقبلين على هذه المرحلة والذين يحملون في طياتهم احلام ويريدون تحقيقها عدم الاستسلام وراء المصاعب ومواجهتها والتغلب عليها بإذن الله .وأتمنى لجميع الطلاب كل التفوق والنجاح في مراحلهم الدراسية .

    مع شكرآ، تحية من كل احترام وتقدير.

  74. .. –

    التخصص حلو واغلب المواد سهله وممتعه بس في مواد تحتاج تركيز من البدايه مثل المحاسبه والمال عشان ماتضيعون ويصير صعب عليكم، تقدر تخلي الصعب سهل بالدراسة اول بأول

  75. Mahmood Aloraibi –

    تخصص جميل وممتع وبطور لغتك في الانج انذ بتروح لي اي تخصص ثاني وبتهرب مثلا عشان الانج لكن مردك بتطب في الانج في الجامعة ف الانج في التجاري مو صعب وبالعكس بعلمك شوي كلمات احسن من ما تنصم في الجامعة مره وحده وتضيع الي متخوفين من التجاري بسبب الانج ف الانج الي فيه كلش كو صعب ومواده حليوه واجد وموقعد استاد ابراهيم ما بقصر وياك

  76. MOHAMED –

    اختصرها لك، تخصص سهل لا تحتاج لمراجعة دامك مركز مع الاستاذ يبيلك اشوي انجلنزي (يعني تعرف الكلمات الاساسية والكلمات الي مطلوبه في مقرر وبس تخصص شربة ماي حط على بالك في مادة الجودة حلوه يبيلها حفظ الفهم الله اعلم وين الفهم وبسس موفق ♥️

  77. Zainab –

    التجاري تخصص وايد حلو وممتع وللناس الي شاردين من المواد العلمية وابدا مافيه صعوبة بالعكس المواد حلوه ومو كله بالانج لا بس بعض المواد والانج المفهوم يعني ابدًا مو عائق ويكون الشرح بالعربي اوردي ف المعلم بيترجم كلشي ، بس اكيد كل تخصص يحتاج تركيز ودراسه اول بأول و مابتندمون اذا دشيتوا تجاري

إضافة مراجعة

لن يتم نشر عنوان بريدك الإلكتروني. الحقول الإلزامية مشار إليها بـ *

منتجات ذات صلة

نظرة عامة حول تخصص المواد التجارية

إضافة إلى السلة